بعد ٤ ايام بالظبط هنبقي في سنة ميلادية جديدة، دايما بحب البدايات، بتفائل بيها مش هنكر. اعتقد ان اللي اخترع فكرة البداية اخترعها بالهدف ده، ان الناس تتفائل تحس ان ممكن تستغل البداية الجديدة عشان تحسن حياتها. خايف من اللي بعد الجيش، خايف من اهتزاز شخصيتي اللي بمر بيه دلوقتي بس في نفس الوقت متشوق جدا للبداية اللي بعد الجيش. السنين اللي فاتت كلها كانت بداية السنة بالنسبة لي اواخر واحد بعد الامتحانات، السنة ديه هتتاخر شهرين و هتبقي ١-٣-٢٠١٦. هحس بسعادة كبيرة جدا بسبب ان البداية المرة ديه بتمثل نهاية مرحلة سيئة الحمد الله.
الوضع كالتالي:
قاعد في مكتب اللواء سيد اللي قضيت فيه ٨ شهور من جيشي وناقصلي شهرين، بفكر في كل اللي حصل في ٢٠١٥ و في الايام القادمة المجهولة حتى الآن. عندي خطة واضحة في دماغي بس خايف اني معرفش انفذها واني اكون فقد اصراري او لمستي السحرية زي ما بسميها بيني وبين نفسي. امبارح كنت فاضي قعد اقلب في تايم لاين الفيسبوك بتاعي وفي مدونتي، اسلوبي في الكتابة تطور وديه حاجة حلوة، كتبت في المدونة اكتر من اي سنة من ساعة لما عملتها، يمكن اكثر النصوص مؤلمة بس مش مهم ساعدتني كتير اني اتخطى الألم، يمكن الحاجة الوحيدة اللي كدرتني بخصوص الكتابة السنة ديه ان اكتر شخص كانت بتخصه النصوص الحلوة اللي كتبتها مشفهاش في الأغلب.
كنت بتكلم مع علاء امبارح اني حاسس اني فاشل في وسط مناقشتنا، قالي بس انت حافظت على صداقاتك حلو جدا و ان الناس بتحبك و قعد يقولي ازاي انا لسة محافظ على معظم صحابي، معاه حق الصراحة بس انا مكنتش واخد بالي لان الانسان لما بيحس انه وحش في حاجة ما مش بياخد باله من باقي الحاجات. يمكن احساس الترك واحساس اني متاخر البي كانوا بيهاجموني السنة ديه بالتبادل طردوا كل الحاجات السحرية اللي المفروض ابقى ممتن اني مريت بيها بس لما بفكر في لحظات هدوئي بفتكر الحاجات الحلوة اللي بسطتني السنة ديه وببتسم
قريت كتب كتير اغلبها اعادة قراءة، في المجمل كانت سنة جيدة على المستوى ده. فقد محمود فؤاد وده اسوء حاجة حصلت السنة ديه ربنا يرحمه هو وياسمين.
بقيت اكثر جرأة في الكتابة ومبقتيش اهتم اني اخبي مشاعري والحاجات الحلوة اللي بحسها او اني اكتب اي نص جميل طالما مفهوش حاجة غلط او ابتذال، يمكن التجربة اللي مريت بيها هي السبب او يمكن الجيش معرفش، بس اللي اعرفه ان دلوقتي احسن.
امنية اخر السنة هي ان روحي تنعم بالهدوء النفسي مهما كانت نتايج خططي طالما عملت اللي عليا و يارب انعم بالعدوء ده قبل نتيجة اول خطوة جدية في ٢٠١٦ اللي هتحين بعد اسابيع قليلة ان شاء الله.
اخر حاجة كل اللي بيقرا في المدونة هنا انا ممتن ليه جدا حتي لو منعرفش بعض و بتمناله عام سعيد ^_^
