الدنيا ريشة في هوا
طيارة بغير جناحين
إحنا النهارده سوا
و بكرة هنكون فين
في الدنيا
في الدنيا
-----------------------
احنا النهاردة بنضحك و بنخطط سوا للمستقبل بنتكلم عن خططنا المشتركة و عن أطفالنا اللى
هيبقوا صحاب زي ما احنا صحاب بنتخيل اننا بعد 10 سنين هنبقى متجمعين زى ما احنا
متجمعين دلوقتى
الدنيا ريشة فى هوا عشان كدة متقلبة و مفيش حاجة من اللى احنا بنقول
انها هتحصل بتحصل ، بعد سنة واحدة تجمعنا كصحاب بدأ يقل، الحياة خدتنا اللى الشغل خده و اللى سافر و
اللى دخل الجيش و قصص الحب اللى كانت بتدور على استحياء أثناء وجودنا فى الكلية
انتهت
7/3/2014 كنت بكلم عاصم عشان نحط خطط المذاكرة اللى مش هنفذها و بتفق مع جودة
هقابله امتى بكرة فى الكلية و بكلم هانى عشان نشوف هنعمل ايه فى الفوتوداى ومازن
طه بيشتم فى مشروع التخرج لما اكلمه، 7/3/2015عاصم فى كندا بيخوض مغامراته الخاصة ، جودة فى السلوم، وانا واقف
بالسلاح حراسة فى وحدة عسكرية مكنتش أتخيل فى يوم من الأيام انى هكون فيها،
الفوتوداى أصبح ذكرى و صور نبص لها و نقول " ياه على الأيام الحلوة ديه " وهانى بيستعد
للحاق بنا فى الجيش والسنة
الجاية فى نفس الميعاد هنكون فى حتت مختلفة بردو
-----------------------
اللي بتسأل عن الحياة
خدها كده زي ما هيا
فيها أبتسامة و فيها أة
في قاسية و حنية
ياما الحياة فيها
اللي بيشقيها
و اللي بيرضيها
و اللي يقاسيها
-----------------------
غريبة جدا الحياة بتجمعنا بسرعة و بتفرقنا أسرع، فى الجيش عرفت ناس فى 20 يوم بس و بعدها احتمال مشفهومش تانى، و حتى اللى اتعرفت عليهم وبقوا عشرة عمر بدأنا نبعد،
بس هى ديه الدنيا ممكن نحارب ضدها و منتقبلهاش بس ده مش هيغير من حقيقتها فنجرب
نصاحبها و نتحمل أحوالها لحد ما نودعها
بهدوء كأننا ممرناش
بيها وزى ما
هى بتدينا لحظات ألم و شجن بتدينا لحظات حلوة بردو زى اننا لازلنا قادرين رغم كل
المسارات المختلفة اللى ماشيين فيها اننا نتقابل و نستعيد ذكريات الزمن اللى كنا
فيه رايقين أكبر مشاكلنا فى الحياة هى إن الكويز جيه صعب
الفكرة ان الكلام ده كله اتقالنا بس احنا مصدقناش
و هنقول للى بعدنا بردو ومش هيصدقوا عشان احنا زى الريشة مش بنصدق الا لما الهوا
يتلاعب بينا !